sabato 6 luglio 2013

Libera poetica : Il segreto dei nuraghi

foto tratta da nugoro.com gallery
IL SEGRETO DEI NURAGHI

“Cal’est s’artista chi t’hat costruidu,
proite in forma conica t’hat fattu”?
si domandat donzunu chi t’hat bidu.
“Pro gale iscopu ses istadu adattu”?

In antigu naschidu in donzi istazzu
rudemente formadu e in modu istranu…
fis tumba, fis prijione o fis palazzu?



Fis in passadu unu tempiu paganu
o fortezza pro cumbattimentu
o residenzia ‘e calchi soveranu?

O innalzadu t’ant pro monumentu
de goi: fraigau a crastos mannos
pro non ti movere né abba, né bentu?



Mancu chin passare de sos annos
non t’hant sas tempestas pudrigadu,
e ses bestidu de matessi pannos.

Chi hat cussos calculos pigadu
devet essere istadu unu gigante,
o a forzas de levas t’hana issadu.

De gale istirpe fint sos abitantes?
Fint de razza nostra o differentes,
de istatura media o bastantes?

De positivu non s’ischit niente:
senza progettu de inzenieris
hant fattu cust’opera imponente.

E cando benint sos istranieris
preguntant tottu ite rappresentat:
ma nois semus che sos furisteris.

De sas fotografias si cuntentant
non lis podimus nudda ispiegare:
e tottu est vanu su chi si cummentat.

E lassamus sa zente immaginare
sorridende pro tantu attribuire.
Sos annos enint e torrana a passare

e nois su segretu senza ischire.



di Paolo Pischedda  ( Bitti, 1907-1973)*



per gentile concessione di Antonio Pischedda



* La presente poesia è stata riportata in una antologia italiana e in un testo edito dal Banco di Sardegna: in quest'ultimo risultava anonima , Antonio Pischedda 
"POETAS" di Cossellu-Burrai di BITTI