lunedì 21 ottobre 2013

Sa leteradura nostra

de Nanni Falconi

Sa leteradura sarda est manna; l'at fata manna Gràtzia Deledda, binchende su Nobel pro sa leteradura italiana. L'at fata manna issa e totus sos àteros chi sunt bènnidos a pustis de issa. Totu gente chi at pubblicadu in domos editoras continentales e bìnchidu prèmios pro sa leteradura italiana.
E sos sardos si nde faghent mannos de apartènnere a sa leteradura de Dante. E benit fàtzile a nàrrere chi cherent apartènnere a cussa leteradura pro si sentire mannos.

Cudda die in Ollolai amus proadu a cuntierrare custa bisione, narende chi pro sos sardos diat deper èssere de prus importu a connòschere cussa fata in sardu puru, ca si no àteru est fata cun cudda limba cun sa cale sos sardos ant chistionadu tra issos pro generatziones, e chi faghet de humus a sa cultura nostra.
Custu ca calicunu at naradu.in cussa ocasone, chi sa leteradura in sardu est mìsera. Gasi mìsera chi no at produidu mancu una òpera de giudu.

L'apo rispostu chi, postu a banda chi semus bator gatos sos chi iscriimus in sardu e sa leteradura puru at bisòngiu de nùmeros mannos pro chi nd'essat unu artista mannu, non depet èssere importante meda sa grandesa de una leteradura. Amus su dovere de la connòschere, fintzas si issa no est famada comente cussa in italianu, ca cussa est sa nostra e non de àtere.



Chi posca, ca gasi m'est pàrfidu de cumprèndere, su de pensare chi in una limba minore non si potzat fàghere leteradura de aficu, est unu pregiudìtziu; gasi comente su de pensare chi su sardu no est atrintzadu a iscrìere de argumentos "artos"


No est importante sa nomea bona chi una leteradura anzena s'at fraigadu in su passare de su tempus, a su mancu no lu est a foras de una connoschèntzia chi serbit a crèschere in nois sas diversidades de sos pòpulos.

Su chi importat de prus est a connòschere sa leteradura nostra, ca cussa nos serbit pro connòschere a nois etotu. A nois etotu e sa sotziedade intro sa cale amus sorte de bìvere.