domenica 13 ottobre 2013

Una limba normale

de Nanni Falconi

Deo cheria solu una limba sarda normale, ma como mi nde so istrachende fintzas de la cherrer. Una limba, ca pro chi issa benzat a esser normale, siat impitada in onzi zassu, in onzi arrejonu e in onzi ocasione de sas relatas nostras. Una limba chi in cale si siat logu tue l'impites, faeddada, scrita o declamada, siat semper sugeta a règulas pretzisas e non lassada a bonu suo comente e como. La cheria ca mi fiat piàghidu chi cando iscrio lu fata pro totu sos sardos e non solu a cuddos pagos chi cumprendent su dialetu meu. Est beru chi totu sos sardos nos cumprendimus apare posca de carchi die chi nos afitianamus, ma est beru puru chi non semus totus a nos afitianare,sa bida nos nche podet giugher atesu de pare. Sos prus de nois, apenas intendimus una persone faeddende in unu dialetu chi amus intesu pagu o mai, nche la cambiamus in italianu e lassamus perder s'ocasione de imparare.

Nos namus chi est tropu matanosu a s'istare a ripitire ite cheret narrer sa persone cun sa cale semus arrejonende e nos leamus su caminu prus curtzu, chi est cussu de faeddare in italianu, ca cussu già lu cumprendimus totus. Gasi est fintzas cando legimus, o iscurtamus sa ràdio o televisione, o andamus a teatru o in cale si siat trastu de comunicatzione. Cantas bias apo intesu gente nèndemi chi non resessit a leger su chi apo iscritu ca no est iscritu in su dialetu suo? Unu muntone in custos annos.
E tando podet esser chi bi nd'apat duos de caminos chi si podent leare: unu est cussu de aer una limba iscrita unica pro totu sa limba sarda e su de duos est  chi sos sardos imparent onzi unu totus sos dialetos de custa limba. In sa cuntierra chene fine pro una limba standard de imparare a sos sardos, b'at ideas diversas e gasi atesu s'una dae s'àtera chi non giagant mai, o a su mancu non las cherent giagare.
Cherio una limba normale de impitare in s'amministratzione, de impitare in sos mèdias, in sas domos imprentadoras,in teatru, in su iscrier libros siat chi issos siant romanzos o sagios iscentificos e gasi sighende.Una limba normale non podet aer che una manera de esser iscrita pro unu motivu si no àteru econòmicu. Gasi est: pro aer una limba normale bi cheret dinari e cheret chi issa diat trabagliu e rendat dinari a chie l'impitat si non cheret fagher beneficièntzia. Nois sardos semus pagos e non semus nen mancu totus interessados a custa chistione. Sas solas cosas chi si semus fatende in sardu la semus fatende ca sa regione las finantziat, si non intervenit issa non si faghet nudda ca non b'at perunu imprendidore chi nche frundit su dinari suo pro amore de sa limba. Bi sunt solu cuddos macos che a mie chi sighint a isperare in su miràculu de sa limba normale.